“Volidai Abdulazizxon” masjidi

Volidai Abdulazizxon masjidi “Havzi nav” mahallasida joylashgan bo`lib, Jo`bor mavzesiga tegishli hisoblanadi. Jo`bor mavzesi yoki mahallasi janubiy – g`arbiy shahar bo`lagini tashkil qiladi. Volidai Abdulazizxon masjidi ikki bo`limdan iborat. Qishgi va yozgi. Qishgi masjid oliy gumbazli bo`lib, yozgi masjid esa gumbazli va ayvonli hisoblanadi. Xonaqoy masjidi Volidai Abdulazizxonga atalib qurilgan. Shundan bilish mumkinki, Volidai Abdulazizxon masjidi XVI asrlarda qurilganligi taxmin qilinadi. Abdulazizxon otasi Ubaydulloxon vafot etganlaridan so`ng , 1540-yil Buxoro hukmdori bo`ldi. Abdulazizxonning piri murshidi Hazrat Shayx Jalol bo`lganlar. Abdulazizxon darveshlarga nisbatan sahovatli bo`lganlar. Bu zoti sharif ikki tilda ya`ni o`zbek va fors-tojik tillarida g`azallar yozganlar. Nasta`liq xatining ustozi, hushxat xattot edilar. Abdulazizxon Buxoroda ko`plab inshootlar barpo qilganlar jumladan, Volidai Abdulazizxon masjidi, Hazrat Bahouddin dahmalari va xonaqolari shu zoti sharif tomonidan qurdirilgan. Abdulazizxon qirq bir yoshida 1550-yil vafot qilganlar. Volidai Abdulazizxon masjidi mustaqillikgacha omborxona, paxtani qayta ishlash korxonasi bo`lib kelgan.
Mustaqillikning sharofati bilan madaniy meros mulkiga kiritilib fuqarolarning diniy ehtiyojlarini qondiradigan masjid bo`lib faoliyat ko`rsatib kelmoqda.